Zyrtarët amerikanë janë vënë në alarm për mundësinë e një operacioni ushtarak të gjerë nga Turqia në veri të Sirisë, që mund të synojë të merrte nën kontroll zonat ku ndodhen kurdët e mbështetur nga SHBA. Sipas raportimeve të "Wall Street Journal" nga burime të saj, forca të mëdha ushtarake turke, përfshirë milicë, komando dhe artileri të rëndë, janë grumbulluar pranë kufirit afër Kobanit, një qytet sirian me shumicë kurde. Lëvizjet e Turqisë vijnë pas rënies së regjimit të Asadit në fillim të dhjetorit, duke i ngjallur kujtime operacionit të vitit 2019 për pushtimin e Sirisë verilindore. Një zyrtar amerikan ka thënë: "Po monitorojmë situatën dhe po bëjmë presion për përmbajtje."
Për më tepër, Ilham Ahmed, një zyrtar i administratës kurde, i ka dërguar një letër presidentit të zgjedhur të SHBA-së, Donald Trump, duke kërkuar që të ndërhyjë dhe të bindë presidentin turk, Rexhep Tajip Erdogan, të shmangë një tjetër pushtim. Në letrën e tij, Ahmed paralajmëron se qëllimi i Turqisë është të vendosë kontrollin mbi territoret kurde para se Trump të marrë detyrën, dhe se një ndërhyrje turke mund të sjellë "pasoja katastrofike."
Ky zhvillim ka vendosur Forcat Demokratike Siriane (SDF) të udhëhequra nga kurdët në një pozicion të vështirë. Sekretari i Jashtëm i SHBA, Anthony Blinken, udhëtoi në Turqi javën e kaluar për të diskutuar të ardhmen e Sirisë dhe për të kërkuar garanci nga Erdogan për të ulur operacionet kundër luftëtarëve kurdë. Megjithatë, bisedimet për armëpushim midis kurdëve dhe rebelëve të mbështetur nga Turqia dështuan pa një marrëveshje. SDF tani raporton për grumbullime ushtarake të mëdha në lindje dhe perëndim të Kobanit, me qytetarët që jetojnë nën kërcënimin e vazhdueshëm të dhunës.
Ahmed ka paralajmëruar se një ofensivë turke mund të shkaktojë zhvendosjen e mbi 200,000 civilëve kurdë nga Kobani dhe ka kërkuar nga Trump të përdorë ndikimin e tij për të parandaluar pushtimin turk dhe për të mbrojtur komunitetet kurde. Ai ka theksuar se Erdogan ka dëgjuar në të kaluarën apelat e SHBA-së dhe beson se udhëheqja e Trump mund të ndihmojë në parandalimin e kësaj katastrofe.
