Nga kryetarja e Kuvendit, tek zv.kryeministrja e ministra, kryetarë bashkish e deputetë, të gjithë kanë filluar takimet për zgjedhjet parlamentare të 11 Majit 2025. Zyrtarisht fushata zgjedhore ende nuk ka filluar por për kryetaren e Kuvendit Elisa Spiropali, për zv.kryeministren Belinda Balluku, ministrin e Brendshëm Ervin Hoxha, ministren Bora Muzhaqi e Anila Denaj dhe kryetarët bashkive nga veriu në jug, së bashku me deputetët po zhvillojnë takime elektorale me qytetarët anembanë vendit. Në prag të zgjedhjeve parlamentare gjithë kabineti qeveritar është angazhuar në takime me qytetarët, inaugurime projektesh dhe aktivitete të ndryshme publike, të cilat perceptohen si pjesë e strategjisë elektorale të PS-së. Mjafton të shikosh profilet zyrtare në rrjetet e tyre sociale, në "Facebook", "Instagram" dhe Tik Tok aty publikojnë takimet me qytetarët me hashtagun për Shqipërinë 2030, Partia Socialiste. Tek të njëjtat profile këta pushtetarë publikojnë takimet si funksionarë shteti në takime zyrtare. Madje janë më të shumta dhe intensive takimet për Partinë Socialiste sesa takimet e punës. Nga një qytet në tjetrin organizojnë festa, forume rinore, takime me gratë, me pensionistët. Në salla të mëdha, gati si lokale dasmash, diku tjetër shtrohen dreka e darka ku siç edhe shkruhet në fotot e takimeve flitet për "hallet e popullit" dhe Shqipërinë 2030. Përdorin pozitën, burimet shtetërore dhe funksionet publike për të promovuar axhendën e Partisë Socialiste, duke shkelur kështu çdo parim të demokracisë funksionale dhe të një shteti normal. Por për t'a dihet: Partia mbi të gjitha, partia mbi Shqipërinë. Nuk ka ndonjë ndryshim të madh midis partisë-shtet në kohën e komunizmit dhe shtetit të partive të krijuar sot. Sepse çdo burim shtetëror është vënë në funksion të Partisë dhe kjo e fundit duhet për të mbajtur pushtetin.
