Që Veliaj është çmësuar me pyetje gazetarësh kjo është e ditur prej vitesh dhe më shumë se e dukshme në një nga ditët më të këqija të karrierës së tij politike. Sot, pas disa orësh në SPAK ku i është dashur t’i përgjigjet pyetjeve të prokurorëve, Veliaj ka shmangur çdo pyetje të gazetarëve.
I mësuar me enturazhin e kamerave që filmojnë dhe transmetojnë me zell propagandën e tij, Veliaj u shfaq i nervozuar dhe madje i habitur që paska dhe pyetje veç recitimit të përhershëm përpara kamerave. Në pozitat e tij, kanë qenë dhe ish miq apo bashkëpunëtorë të tij, e megjithatë në një moment u është dashur t’u përgjigjen pyetjeve.
Sepse sado e sponsorizuar dhe hapësirë të ketë në media propaganda, ajo që publiku do të dëgjojë është e vërteta. Ajo që del në dritë në ditët më të errëta të politikanëve. Në dritën e SPAK është e qartë që shumë të vërteta të fshehura pas propagandës do bëhen publike. Dhe çdo përpjekje për t’iu shmangur pyetjeve mund të duket si injorim i përkohshëm.
Por ato përgjigje që jepen në zyrat e SPAK janë të përhershme. Dhe atyre nuk u shmangesh dot si gazetarëve. Aty përgjigjesh siç duhet e pa të drejtën e montazhit. Sepse në SPAK të vërtetat kanë çjerrë shumë maska dhe zhbërë shumë propagandë. Por jo vetëm kaq…/ D.M
