Ish-deputeti socialist Jurgis Çyrbja do të dëshmojë nesër para prokurorëve të Posaçëm, të cilët dyshojnë se ai është i përfshirë në korrupsion zgjedhor, tregtim të sekretit shtetëror dhe përkrahje të autorëve të krimit. Çyrbja pritet të japë shpjegimet e tij të premten në orën 11:00, në praninë e avokatit mbrojtës. Pas dëshmisë së tij, prokurorët do të vazhdojnë me marrjen në pyetje të personave të tjerë që janë identifikuar deri tani, përmes komunikimeve të zbërthyera nga Çyrbja dhe individë të tjerë.
Sipas SPAK, Çyrbja është i akuzuar për tre vepra penale: “Korrupsioni aktiv në zgjedhje”, “Përkrahja e autorit të krimit” dhe “Tregtimi i sekretit shtetëror nga shtetasit”. Po ashtu, ndaj tij është caktuar masa e sigurimit "arrest në burg" nga Gjykata e Posaçme e Shkallës së Parë për Korrupsionin dhe Krimin e Organizuar.
Ish-deputeti socialist u arrestua disa ditë pasi dorëzoi mandatin e deputetit dhe u mor në hetim nga SPAK. Pas dorëzimit të mandatit, Çyrbja ka deklaruar se vendimi për t’u tërhequr nuk lidhet me shqetësime ligjore, por me nevojën për të pasur kujdes shëndetësor.
Hetimet e SPAK zbuluan se, për t’u siguruar një mandat deputeti në Durrës gjatë zgjedhjeve të vitit 2021, Çyrbja ka informuar figura të njohura të botës së krimit për operacionet policore, në mënyrë që ata të shmangnin arrestimet. Nga zbërthimi i komunikimeve në platformën SKY ECC, rezulton se Çyrbja kishte lidhje me individë të njohur si Edmond Koçi (Mond Çekici), i ekzekutuar në vitin 2021, dhe Altin Hajri, i shumëkërkuar për rastin e rrëmbimit të Jan Prengës. Këta persona, sipas SPAK, kanë pasur ndikim tek zyrtarët socialistë për të siguruar vendin e Çyrbjas në listat zgjedhore.
