Punonjësi i policisë së burgut 313, ku janë izoluar bosët e krimit të organizuar, po kthehej në shtëpinë e tij pasi kishte përfunduar punën si roje sigurie në një lokal në qendër të Tiranës, kur tre persona, që udhëtonin me një fuoristradë të bardhë, ndaluan me shpejtësi pranë tij dhe e sulmuan. "Më kërcënuan. Më thanë që bëj kontrolle të rrepta në burg. 'Vazhdo bëji dhe do ta shohësh,'” tha polici për hetuesit, duke pretenduar se sulmi kishte lidhje me detyrën e tij. 36-vjeçari pretendon se nuk mundi t’i identifikojë agresorët, pasi gjithçka ndodhi në pak sekonda. Gjatë sulmit, ata e goditën me shkopinj bejsbolli. "Mbaj mend që më afruan me një makinë të bardhë. Nuk kujtoj shumë detaje, pasi humba ndjenjat," kujton punonjësi i burgut. Policia dyshon se ai nuk ka treguar të vërtetën dhe po hetohet jo vetëm për lidhjen me detyrën që ushtron në burg, por edhe për konflikte të tjera që mund të ketë pasur. 36-vjeçari, që ka përfunduar Universitetin e Sporteve, është rekrutuar si punonjës policie në burgje rreth 7 vite më parë. 3 vitet e fundit ai ishte transferuar në IEVP të sigurisë së lartë në rrugën 'Jordan Misja".
