Ish-ministri i Jashtëm shqiptar, Paskal Milo, ka ngritur shqetësime lidhur me spekulimet për një shtet të mundshëm të bektashinjve, duke sugjeruar se pas kësaj ideje mund të qëndrojë Izraeli. Milo, një historian dhe ekspert i marrëdhënieve ndërkombëtare, ka theksuar se vizita e fundit e presidentit izraelit në Tiranë dhe takimi i tij i veçantë me Baba Mondin, Kryegjyshin Botëror të Bektashinjve, ishte një ngjarje e pazakontë që nuk është parë më herët në protokollet zyrtare.
“Një arsye për këtë takim mund të jetë interesi i Izraelit për të ndarë komunitetet myslimane, duke pasur parasysh armiqësinë e tyre tradicionale me botën arabo-myslimane,” tha Milo. Sipas tij, krijimi i përçarjeve mes komuniteteve myslimane mund të jetë në interes të Izraelit, por ai gjithashtu nënvizon se lojtarë të tjerë mund të jenë të përfshirë në këtë çështje.
Milo theksoi se nuk e sheh këtë si një përpjekje të drejtpërdrejtë të Izraelit, por si pjesë e një loje më të madhe me përmasa ndërkombëtare. “Izraeli mund të ketë një rol, por nuk është lojtari i vetëm,” përfundoi ai.
