Shumë nga filmat e ardhshëm janë vazhdime, rikthime ose zgjerime të serive të njohura, një dëshmi e prirjes së Hollywood-it për të luajtur të sigurt me projekte të provuara. Por kjo pasqyron gjithashtu dëshirën tonë kolektive për të parë se ku shkojnë më tej disa nga personazhet dhe botët tona të dashura.
Ndërsa lista nuk është e plotë, këtu janë disa nga filmat më të rëndësishëm që pritet të dalin në 2025:
“Back in Action”
Siç tregon titulli, ky është një film spiun i Netflix që shënon “rikthimin” e dy yjeve të dashur – Cameron Diaz, e cila ishte larguar nga skena e filmave të mëdhenj për rreth dhjetë vjet, dhe fituesi i Oskarit, Jamie Foxx, që rikthehet pas disa problemeve shëndetësore. Çifti kishte punuar më parë së bashku në muzikalen “Annie” të vitit 2014. “Back in Action” do të fillojë transmetimin më 17 janar.
“The Fantastic Four: First Steps”
Pas një viti relativisht të qetë me dy projekte të mirëpritura të Marvel-it – “Deadpool & Wolverine” në kinema dhe serialin “Agatha All Along” në televizion – Marvel po rikthehet fuqishëm me tre filma të rinj për vitin 2025: “Captain America: Brave New World” në shkurt, “Thunderbolts” në maj dhe “The Fantastic Four: First Steps”, që del më 25 korrik.
Ky i fundit ka në rol Pedro Pascal, Joseph Quinn nga “Stranger Things,” Ebon Moss-Bachrach nga “The Bear” dhe Vanessa Kirby. Ky është përpjekja e tretë e madhe e studiot për të sjellë këtë katërshe superfuqish në jetë, pas dy filmave të prodhuar në 2005 dhe 2007, dhe një rikthimi të dobët në 2015 me Miles Teller dhe Kate Mara.
“Superman”
Nga ana tjetër e botës së librave me vizatime, James Gunn po përgatitet të nisë versionin e tij të Universit të DC-së me stil madhështor me “Superman,” më parë i titulluar “Superman: Legacy.” Në rolet kryesore janë David Corenswet dhe Rachel Brosnahan nga “Marvelous Mrs. Maisel.” Traileri i muajit të kaluar zbuloi disa skena dramatike dhe qenushin e vogël (super) të Clark Kent-it. “Superman” do të dalë në kinema më 11 korrik, dy javë përpara “Fantastic Four.”
“Mickey 17”
Kanë kaluar gjashtë vjet që nga filmi “Parasite” i regjisorit vizionar korean Bong Joon Ho, që fitoi Oskarin. Filmi i tij i ri, “Mickey 17,” do të dalë në prill pas disa shtyrjeve. Me Robert Pattinson në rolin kryesor, filmi duket si një komedi satirike e zhanrit fantastiko-shkencor, që trajton tema të errëta dhe të rënda. Ai ndjek një klon “të sakrifikueshëm” që përballet me një mision të rrezikshëm në hapësirë. “Mickey 17” do të dalë në kinema më 18 prill.
“Wicked: For Good”
Pjesa e dytë e eventit muzikor më të madh të këtij viti pritet të dalë në kinema pothuajse një vit pas premierës së pjesës së parë. Vazhdimi do të ndjekë shoqet e ndara Elphaba dhe Glinda, teksa përpiqen të gjejnë vendin e tyre në botën e madhe dhe të ligë të Ozit. “Wicked: For Good” do të dalë në kinema më 21 nëntor 2025.
“Michael”
Pas shumë pritjesh dhe spekulimesh, filmi biografik për Michael Jackson do të dalë në kinema në vitin e ri, me nipin e Mbretit të Popit, Jaafar Jackson, që luan rolin e yllit të ndjerë. Në kast përfshihen edhe Colman Domingo, Miles Teller, Nia Long dhe Larenz Tate. Filmi, që pritet të ndezë debate mbi ndarjen e artit nga artisti, do të ketë premierën më 3 tetor.
