Partia Demokratike mblodhi sot Këshillin Kombëtar për të nisur përgatitjet për zgjedhjet e ardhshme parlamentare. Kryetari Sali Berisha e hapi mbledhjen duke deklaruar se ky është shtatori i fundit që demokratët do të jenë në opozitë. Ai kërkoi që gjatë 9 muajve të ardhshëm partia të kalojë nga mbrojtja në sulm, duke theksuar se secili duhet të përsërisë çdo ditë dy fjalë: “sulm” dhe “fitore.” Berisha nënvizoi se këto 9 muaj do të jenë vendimtarë për fitoren e opozitës, pavarësisht se nuk përjashtoi mundësinë që Rama të manipulojë sërish zgjedhjet.
Lideri demokrat përmendi blerjen e votave dhe patronazhistët si faktorë që ndikuan në fitoren e zgjedhjeve nga Edi Rama. Ai shprehu pasiguri për faktin që edhe nëse këto shkelje evidentohen, SPAK nuk do t’i hetojë, duke lënë të paqartë mënyrën se si demokratët do të mbrojnë votën.
Berisha kërkoi një komunikim intensiv me qytetarët shqiptarë, të cilët sipas tij përjetojnë “vellon e zezë të censurës kombëtare.” Ai kritikoi edhe mediat si Top Channel dhe Report TV, duke i cilësuar si zëdhënëse të propagandës qeveritare.
Megjithatë, Berisha vuri theksin tek rrjetet sociale si një mjet kryesor komunikimi, duke ndjekur shembullin e Ramës, i cili disa ditë më parë mblodhi ministrat për të fokusuar komunikimin në rrjetet sociale. Ai i ngarkoi Këshillit Kombëtar detyrën që të jenë të vëmendshëm dhe të shfrytëzojnë maksimalisht rrjetet sociale, si dhe të zhvillojnë takime "derë më derë", të cilat sipas tij tregojnë forcën e demokratëve.
Në përfundim, Berisha bëri thirrje për të nisur një strategji sulmi dhe protestash në çdo vend ku qytetarëve u bëhet padrejtësi. “Të gjithë, nga deputetët deri te drejtuesit, duhet të jemi në krye të kësaj beteje, të këtij sulmi, të mosbindjes civile,” përfundoi ai, duke theksuar se vetëm kështu do të mund të rikthehet vota e lirë.
