Dhuna ndaj fëmijëve në zonat e konfliktit të armatosur arriti përmasa të paprecedenta gjatë vitit 2024, paralajmëron një raport i ri tronditës i Kombeve të Bashkuara, i nënshkruar nga Sekretari i Përgjithshëm António Guterres.
Sipas raportit vjetor të publikuar të enjten, në vitin 2024 u verifikuan 41,370 shkelje të rënda ndaj fëmijëve, një rritje alarmante prej 25% krahasuar me vitin 2023. Kjo shifër përfshin 36,221 raste të ndodhura në vitin 2024 dhe 5,149 raste të mëparshme, të konfirmuara gjatë vitit të kaluar. Ky është numri më i lartë që nga krijimi i mekanizmit monitorues të OKB-së për këtë qëllim, pothuajse tri dekada më parë.
Nga Rripi i Gazës deri te Republika Demokratike e Kongos, fëmijët vazhdojnë të jenë ndër viktimat më të prekura të konflikteve të armatosura. Më shumë se 4,500 fëmijë kanë humbur jetën, ndërsa mbi 7,000 janë plagosur vetëm gjatë vitit 2024.
“Britmat e këtyre 22,495 fëmijëve të pafajshëm, të cilët duhet të mësonin të lexonin ose të luanin futboll, por në vend të kësaj u detyruan të mësonin si të mbijetonin nga të shtënat me armë ose bombardimet, duhet të na mbajnë zgjuar çdo natë”, deklaroi Virginia Gamba, e dërguara speciale e OKB-së për fëmijët dhe konfliktet e armatosura. “Ata duhet të na zgjojnë. Jemi në një pikë pa kthim.”
Raporti ngre alarmin për rritjen e fëmijëve të ekspozuar ndaj shkeljeve të shumëfishta, përfshirë vrasje, rrëmbime, përdorim si ushtarë, dhunë seksuale dhe pengesa në aksesin ndaj ndihmës humanitare.
OKB i bën thirrje komunitetit ndërkombëtar për veprime urgjente, për të ndalur ciklin e dhunës dhe për të mbrojtur brezat e rinj nga pasojat shkatërruese të luftërave.
