Ndodh edhe kjo në administratën e Edi Ramës. Drejtoresha e re e Përgjithshme e Burgjeve, Sadleva Bodo, e emëruar vetëm nëntë ditë më parë, ka dhënë dorëheqjen, duke iu bindur urdhrit të kryeministrit për largimin e drejtuesve të institucioneve në varësi të ministrive.
Burime të VNA bëjnë me dije se Bodo ka qenë e para që është paraqitur në Ministrinë e Drejtësisë për të dorëzuar dorëheqjen, pa arritur ende të mbushë dhjetë ditë në detyrë.
Në fakt, porosia e Edi Ramës për ministrat është që të bëjnë edhe një vlerësim të performancës së drejtuesve përpara se të vendosin për shkarkimin e tyre.
Por çfarë performance mund t’i vlerësohet Sadleva Bodos, e cila nuk ka pasur kohë as të emërojë sekretaren, përveçse të publikojë disa fotografi në Facebook nga ditët e para në detyrë?
Ajo sapo kishte marrë drejtimin e Burgjeve, kur iu desh të paraqiste dorëheqjen. Nuk pati kohë as të tregonte nëse ishte e aftë për detyrën që i ishte besuar.
Tani i mbetet ministrit të Drejtësisë të vlerësojë performancën e një drejtoreshe që ende nuk ka pasur kohë të punojë.
Nëse emërimi i saj ishte i merituar në 14 tetor, çfarë ka ndryshuar në nëntë ditë? Dhe nëse sot duhet të largohet për shkak të performancës, kush do ta vlerësojë performancën e atyre që e emëruan?
