Fatime Kryemadhi, nëna e deputetes së Partisë së Lirisë, Monika Kryemadhi qëndroi për më shumë se 5 orë në SPAK duke dhënë shpjegime për një hetim të çelur ndaj së bijës pas kallëzimit për kontratat lobuese me Shtetet e Bashkuara të Amerikës.
Pasi iu përgjigj interesit të prokurorëve të posaçëm, jashtë dyerve të SPAK, Fatime Kryemadhi tha se hetimet ndaj vajzës së saj janë të motivuara politikisht, që kur ajo vendosi të denonconte aferën e djegësave (inceratorëve).
“Unë jam mamaja e Monikës. Jam krenare për vajzën që kam. E di pse ka nisur kjo punë. Që kur filloi të merret me djegësat ajo, këto filluan”, tha Fatime Kryemadhi. Nëna e deputetes shpjegoj më tej se prokurorët e pyetën për pasurinë. “Unë i sqarova të gjithë gjërat e mia. Më pyetën për çështjen e blerjes së shtëpisë, unë nuk isha pa shtëpi, kam punuar gjithë jetën. Se këta më paskan nxjerrë se e paskam blerë shtëpinë me 160 mijë lekë”, tha ajo.
Fatime Kryemadhi shpjegoj po ashtu edhe se pallatin që kanë ndërtuar në zonën e Astirit. Sipas saj godina është ndërtuar me shpenzimet e saj në tokë që i ka lënë i shoqi.
Në vijim, ajo shtoi se e ka ndihmuar financiarisht vajzën e saj deputete dhe se çdo qindarkë e ka të justifikuar.
“Për fëmijët i kam lekët unë, pse për kë i kam. I kam të gjitha me bankë, shkoni shihini”, tha Kryemadhi.
Në vijim, ajo nuk nguroi të thumbonte kryebashkiakun e Tiranës, Erion Veliaj, nisur nga arrestimet e fundit të drejtorëshe dhe ish drejtorëve me të rëndësishëm të këtij institucioni, për akuzën e korrupsionit në lidhje me dosjen 5D kur tha “As kam bërë tendera, as djegësa, as 5D, as 7D”.
Zonja Kryemadhi pati një këshillë edhe për gazetarët.
“Një lutje kam për gazetarët, mos shkruani çfarë u thonë njerëzit që blihen, ose që bëjnë luftë politike. Verifikoni çfarë shkruani”, theksoi ajo.
Fatime Kryemadhi u pyet disa muaj pasi në shtëpinë e saj u ushtrua kontroll dhe sekuestrua një cellular të markës I-phone. Deputetja Kryemadhi e kundërshtoi në rrugë gjyqësore vendimin e SPAK për sekuestron e telefonit, por është rrëzuar në të gjitha shkallët e gjyqësorit.
SPAK nisi hetimet ndaj çiftit Meta-Kryemadhi pas një kallëzimi të ish-deputetit Halit Valteri për kontratat e lobimit me SHBA-në, hetim që u shtri edhe mbi pasurinë.
Ditët e fundit Ilir Meta, ish president, ka ashpërsuar gjuhën ndaj kreut të SPAK, Altin Dumani, duke iu drejtuar me shprehjet Dum Dumani, SPAK torollaku.
