Akti normativ i qeverisë për disa ndryshime në “Ligjin për Urdhrin e Mjekëve” erdhi si përgjigje ndaj skandalit që shpërtheu në Spitalin Onkologjik, ku mjekët detyronin pacientët onkologjikë të trajtoheshin në klinikat e tyre private. Për këtë arsye, qeveria mendoi hartimin e një drafti që, sipas autoriteteve, synon të minimizojë konfliktin e interesit në radhët e mjekëve.
Ndryshimet parashikojnë që stafi shëndetësor që punon njëkohësisht në sistemin publik dhe privat të kufizohet në punë deri në 12 orë në javë në sektorin privat. Pas autonomisë financiare të strukturave shëndetësore publike, mjekëve do t'u ndalohet plotësisht dypunësimi. Shefat e shërbimit nuk do të mund të kenë klinika private, ndërsa mjekët që zgjedhin të punojnë në sektorin privat do të duhet të marrin lejen e eprorit, ndërsa për ta do të mbahet një regjistër elektronik.
Ministrja e Shëndetësisë dhe Çështjeve Sociale, Albana Koçiu, gjatë prezantimit të draftit tha se, për zbatimin e këtyre pikave do të ngrihet një Komision Disiplinor, por kriteret dhe baza mbi të cilat do të funksionojë ky komision nuk u bënë të ditura.
Situata duket të qartësohet nga kreu i Urdhrit të Mjekëve, Fatmir Brahimaj, i cili shton dyshimet se përmes këtyre ndryshimeve, Ministria e Shëndetësisë në fakt synon kapjen e Urdhrit të Mjekut, që deri dje ishte një institucion i pavarur, jobuxhetor, që funksiononte me ligjin dhe rregullat e tij të mirëpërcaktuara.
Duke shprehur kundërshtinë e tij, Brahimaj thotë se këto ndryshime synojnë kthimin e Urdhrit në një shtojcë të Ministrisë. "Nga një organizëm edukues, ai kthehet në ndëshkues; nga i pavarur, kthehet në një shtojcë të Ministrisë së Shëndetësisë. Kodi i etikës dhe deontologjisë mjekësore do të hartohet nga ne, por ekskluzivitetin e miratimit do ta ketë Ministria e Shëndetësisë.
Gjithashtu, gjykimi profesional, një element tjetër i rëndësishëm që bazohet në rregulloren e hartuar dhe ka funksionuar për vite me radhë, tani do të ketë një strukturë dhe kritere të përcaktuara nga Këshilli i Ministrave," tha kreu i Urdhrit të Mjekëve, Fatmir Brahimaj. Sipas tij, nëse Kuvendi dhe Qeveria nuk rishikojnë aktin normativ dhe nuk hartojnë një ligj sipas legjislacionit europian, bazuar në modelet e homologëve, Asambleja Kombëtare e Urdhrit të Mjekëve do ta çojë aktin në Gjykatën Kushtetuese.
