Industria shumë miliardëshe franceze e ujit mineral po përballet me një krizë të madhe, mes shqetësimeve për ndryshimet klimatike dhe ndikimin e saj mjedisor. Në qendër të debatit është nëse marka ikonike Perrier mund të vazhdojë të quhet “ujë mineral natyral” pas akuzave për përdorim të sistemeve të paligjshme filtrimi, për të luftuar ndotjen e burimeve të ujit pas viteve të thata të lidhura me ndryshimet klimatike.
Hetimet e gazetës Le Monde dhe Radio France zbuluan se të paktën një e treta e ujit mineral të shitur në Francë është trajtuar në mënyrë të paligjshme me filtra karboni, drita ultravjollcë ose mikro-mesh ultra të imta, duke shkelur rregulloren e BE-së që ndalon çdo ndryshim të ujit nga burimi deri në shishe. Edhe pse nuk ka pasur rrezik për shëndetin publik, zbulimi tronditi industrinë, e cila e shet ujin me çmime të larta duke u mbështetur tek imazhi i pastërtisë natyrore.
Perrier dhe kompania mëmë Nestlé akuzohen se, me ndihmën e qeverisë franceze, kanë fshehur informacionin për ndotjen dhe kanë ndryshuar rregullat për të lejuar filtrimin. Në një seancë në Senat, CEO i Nestlé pranoi përdorimin e metodave të paligjshme dhe një raport zyrtar rekomandoi heqjen e statusit “ujë mineral natyral” për prodhimin e Perrier. Nëse kjo ndodh, do të jetë hera e parë në 160 vite që marka humbet këtë etiketë. Sipas ekspertëve, ndryshimet klimatike dhe thatësirat e vazhdueshme në jug të Francës kanë goditur veçanërisht zonën ku buron Perrier, duke vënë në pikëpyetje të ardhmen e saj.
