Laburistët në pushtet në Britaninë e Madhe do të publikojnë së shpejti një plan për të trajtuar migracionin, pasi numri i njerëzve që kanë kaluar Kanalin ka arritur një moment historik. Sipas Sky News, mëngjesin e kësaj të diele, dy varka të vogla me dhjetëra emigrantë në bord u kapën në Kanal, duke çuar numrin e kalimeve që nga korriku në më shumë se 20,000.
Këto kalime janë të parat që nga data 16 nëntor. Para kësaj date, 19,988 kalime ishin regjistruar që kur laburistët fituan zgjedhjet më 4 korrik. Sipas shifrave zyrtare, totali i emigrantëve që kanë kaluar këtë vit është 33.562, pa përfshirë natën e kaluar.
Ministri i qeverisë, Pat McFadden, i tha Sky News se Mbretëria e Bashkuar "do të ketë gjithmonë nevojë për migrim", por ky proces duhet të balancohet me trajnimin e fuqisë punëtore britanike, në mënyrë që "të mos varen vetëm nga migrimi". Ai shtoi se laburistët do të publikojnë një plan këtë javë për të reduktuar migrimin legal dhe ilegal.
