Presidenti i zgjedhur i SHBA, Donald Trump, ka kërkuar nga vendet anëtare të grupit BRICS (Brazil, Rusia, India, Kina dhe Afrika e Jugut) që të mos krijojnë një monedhë të re ose të mbështesin ndonjë monedhë tjetër të huaj për të zëvendësuar dollarin amerikan. Ai ka paralajmëruar se, nëse këto vende nuk e respektojnë këtë kërkesë, do të përballen me tarifa 100%.
Në një postim në platformën Truth Social, Trump tha: “Kërkojmë që ato vende të angazhohen që të mos krijojnë një monedhë të re BRICS dhe as të mbështesin ndonjë monedhë tjetër për të zëvendësuar dollarin e fuqishëm amerikan. Në të kundërt, do të përballen me tarifa 100% dhe do t’u duhet të presin lamtumirën për shitjet në ekonominë e madhe amerikane.”
Më tej, Trump ka shtuar se nuk ka asnjë mundësi që BRICS të zëvendësojë dollarin amerikan në tregtinë ndërkombëtare.
Grupi BRICS përbëhet nga pesë ekonomitë më të mëdha në zhvillim: Brazili, Rusia, India, Kina dhe Afrika e Jugut, dhe bashkon gjithashtu shtete si Irani, Egjipti, Etiopia dhe Emiratet e Bashkuara Arabe.
