Qeveria e Edi Ramës tashmë mund të konsiderohet qeveria e emrave të rinj, thuajse të panjohur për publikun. Emra të rinj, me eksperiencë disavjeçare në administrate, por thuajse me kontribut 0 në politikë, ministrat e rinj janë “hiri” që Edi Rama i hedh publikut sa herë për të zbehur përkohësisht korrupsionin dhe imazhin skandaloz të qeverisjes.
Pirro Vëngu është një emër pak i njohur për publikun. Ai nisi karrierën me qeverinë e PS si drejtor kabineti i Ministrit të Jashtëm Ditmir Bushati. Që në atë kohë, opozita denoncoi faktin se Vëngut, me pasaportë greke i kishte mbërritur fletëthirrja për të kryer shërbimin ushtarak në Greqi. Zhurma e skandalit kaloi ditën e tretë dhe zoti Vëngu më pas mori dhe detyra të tjera të rëndësishme. Së fundmi, ai ishte drejtor i Portit të Durrësit.
Ministri i Mbrojtjes së Shqipërisë mes punëve të përditshme, tashmë ka një problem të madh për të zgjidhur: a do mundet një shtetas shqiptar me pasaportë greke të drejtojë mbrojtjen e vendit? A ështe e mundur që duke zotëruar pasaportën e nje vendi (si Greqia) që ka ende në fuqi ligjin e luftës me Shqipërinë Ministri i Mbrojtjes të konsiderohet serioz në detyrën e tij?
Ministri i Brendshëm Ervin Hoxha gjithashtu ka mbajtur poste të rëndësishme në administratën publike. Kryesisht ai ka qenë i angazhuar në Policinë e Shtetit, në pozicione drejtuese ku nuk ka patur ndonjë rezultat për t’u mbajtur mend, veç emrit të rëndësishëm të drejtorisë përkatëse. Së fundmi ndaj tij u depozitua dhe një kallëzim për shpërdorim detyre dhe korrupsion në SPAK. Kallëzimi u bë në SPAK në dhjetor 2023 nga ish-Drejtori i Drejtorisë së Inspektimit Juridik në IMT Shkodër, por dosja i ka kaluar për hetim Prokurorisë së Tiranës në janar 2024.
Petrit Malaj Ministri i ri i Financave është thuajse i panjohur edhe pse në janar të këtin viti u zgjodh drejtor ekzekutiv i Agjencisë së Burimeve Natyrore (AKBN).
CV e tij është plot me angazhime private dhe katapultimi në drejtimin e financave është një hap tjetër në drejtimin skandaloz të financave shqiptare gjatë qeverisjes së PS.
