Në një deklaratë zyrtare në Telegram, Kremlini ka njoftuar se një armëpushim i përkohshëm do të hyjë në fuqi nga ora 18:00 e sotme (me orën ruse) dhe do të zgjasë deri në mesnatën e 21 prillit.
“Trupat tona duhet të jenë të gatshme për të zmbrapsur çdo shkelje të mundshme të armëpushimit dhe provokimet nga armiku, si dhe çdo veprim agresiv të tij”, thuhet në deklaratën e Kremlinit, duke theksuar se Moska pret që pala ukrainase të ndjekë të njëjtin shembull.
Ndërkohë, agjencia Bloomberg raportoi më herët se presidenti amerikan Donald Trump është i gatshëm të njohë pushtimin rus të Krimesë, si pjesë e një marrëveshjeje më të gjerë paqeje mes Rusisë dhe Ukrainës. Burime të njohura me çështjen thanë se ky mund të jetë një nga koncesionet kryesore për të çimentuar një marrëveshje armëpushimi, megjithëse ende nuk është marrë një vendim përfundimtar.
Lëvizja e mundshme nga SHBA shihet si një sinjal i qartë i përpjekjes së administratës Trump për të përshpejtuar procesin e paqes. Ai dhe Sekretari i Shtetit, Marco Rubio, paralajmëruan të premten se nëse nuk arrihet shpejt progres, SHBA mund të tërhiqet nga përpjekjet për paqe.
Krimea u aneksua nga Rusia në vitin 2014, pas një pushtimi të shpejtë dhe një referendumi të mbajtur nën okupim. Komuniteti ndërkombëtar nuk e ka njohur kurrë sovranitetin rus mbi gadishullin, për të shmangur legjitimimin e një akti të cilësuar si aneksim i paligjshëm.
Një vendim i mundshëm për njohjen e Krimesë nga SHBA do të shënonte një ndryshim të madh në qëndrimin perëndimor, dhe sipas ekspertëve, mund të minojë ligjin ndërkombëtar që ndalon sekuestrimin e territorit me forcë.
Presidenti ukrainas Volodymyr Zelensky ka deklaruar vazhdimisht se nuk do të dorëzojë asnjë pjesë të territorit ukrainas, përfshirë Krimenë, ndërsa presidenti rus Vladimir Putin ka kërkuar prej kohësh njohjen ndërkombëtare të këtij territori si pjesë e Federatës Ruse.
Sipas raportimit të Bloomberg, SHBA i ka paraqitur aleatëve të vet një propozim për marrëveshje paqeje, gjatë një takimi në Paris të enjten. Propozimi përfshin kushtet për përfundimin e luftimeve dhe një lehtësim të mundshëm të sanksioneve kundër Moskës, në rast të një armëpushimi të qëndrueshëm.
Sipas burimeve, propozimi do të ngrijë vijën aktuale të frontit, duke lënë shumicën e territoreve të pushtuara nga Rusia nën kontrollin e saj de facto. Gjithashtu, ambiciet e Ukrainës për t’u anëtarësuar në NATO nuk do të përfshihen në këtë marrëveshje.
As Shtëpia e Bardhë dhe as Departamenti i Shtetit nuk kanë komentuar zyrtarisht mbi raportimin
