Politikat fiskale të administratës Trump kanë vënë në vështirësi FIFA-n në prag të “Botërorit për Klube” që do të mbahet në SHBA.
Sipas “The Guardian”, FIFA ende nuk ka arritur një marrëveshje për përjashtime fiskale për 32 klubet pjesëmarrëse. Pa një marrëveshje të tillë, çdo ekip finalist do të detyrohet të paguajë deri në 10 milionë dollarë taksa në SHBA, duke rrezikuar që pjesa më e madhe e shpërblimeve – që arrijnë deri në 1 miliard dollarë në total – të përfundojë në duart e autoriteteve fiskale amerikane.
Fituesi i turneut pritet të përfitojë mbi 125 milionë dollarë, duke e kthyer këtë kampionat në më të pasurin në historinë e futbollit.
FIFA po përpiqet të ndjekë të njëjtin model si për “Botërorin 2026”, ku ka arritur disa lehtësira mbi taksat e biletave dhe të drejtave televizive. Presidenti i FIFA-s, Gianni Infantino, ka vizituar dy herë SHBA-në kohët e fundit dhe është takuar me Donald Trump për të negociuar zgjidhje.
Koha po mbaron, dhe marrëveshja është vendimtare për të shmangur humbje të mëdha financiare për klubet pjesëmarrëse.
