Pas aksionit në qytetin e Kavajës, ku u kontrolluan banesa të Elvis Rroshit dhe katër personave të tjerë, mëngjesin e sotëm një njësi e Byrosë Kombëtare të Hetimit ka zbarkuar në Elbasan për të kryer kontrolle të tjera të autorizuara.
Kontrollet janë zhvilluar në bashkëpunim me Policinë e Qarkut dhe janë pjesë e zbatimit të një vendimi penal të lëshuar nga Gjykata e Posaçme kundër Korrupsionit dhe Krimit të Organizuar. Bëhet fjalë për kontrollin e ambientit të një biznesi privat, një lokali si dhe tre banesave të ndryshme në qytet.
Deri në këtë fazë të hetimeve, ende nuk është bërë e ditur zyrtarisht identiteti i personave nën hetim apo të targetuar nga SPAK dhe BKH. Megjithatë, burime konfirmojnë se aksioni lidhet me hetimet mbi korrupsionin zgjedhor.
Ky hetim është iniciuar disa ditë përpara zhvillimit të zgjedhjeve të 11 majit dhe kontrollet po realizohen shtatë ditë pas përfundimit të procesit të votimit dhe numërimit në qarkun e Elbasanit, ku Partia Socialiste doli fituese me 10 mandate.
Gjatë operacionit janë sekuestruar telefona celularë, pajisje DVR dhe materiale të tjera që pritet të analizohen nga hetuesit. Ky konsiderohet si ndërhyrja e parë e drejtpërdrejtë e SPAK në qytetin e Elbasanit në kuadër të hetimeve për manipulimin e zgjedhjeve, edhe pse gjatë fushatës dhe ditës së votimit nuk u raportua zyrtarisht asnjë rast nga Task-Forca e ngritur për ndjekjen e fenomeneve të paligjshme zgjedhore.
