Sokol Balla, gjatë një monologu televiziv, shprehu një paralajmërim ndaj Gazment Bardhit lidhur me publikimin e mesazheve që pretendojnë se ai ka marrë financime nga individë të përfshirë në krim. Mesazhet, të cilat sipas pretendimeve janë nga aplikacioni i koduar “SKY ECC”, përfshinin Erigers Mihasin dhe Ervis Martinajn dhe thuhej se ata kishin financuar Bardhin me 100 mijë euro për fushatën elektorale.
Balla këshilloi Bardhin që të jetë më i kujdesshëm me informacionet që publikon dhe i përmendi si shembull rastin e Salianjit, i cili ka përfunduar në burg, dhe atë të Ervis Martinajt, i cili është zhdukur prej gushtit të vitit 2022. Ky paralajmërim nënkupton që veprimet e pamatura mund të kenë pasoja serioze.
"Gazment Bardhit po i shtohen çështjet që lidhen me drejtësinë edhe SPAK sot e paralajmëroi, e njoftoi se mesazhet që e lidhin me Vis Martinajn ishin të sajuara, por duke e këshilluar që herë tjetër të mos nxitohet ai dhe të tjerët për të publikuar materiale të paverifikuara. Ndoshta një paralajmërim që ai të mos thellohet në gabimet e Salianjit, pasi karma të rikthehet herë në formën e Vinit, herë në formën e Visit dhe në çdo rast fundi nuk është i lumtur”, nënvizoi Sokol Balla
Pas monologut ka reaguar Gazment Bardhi me një letër të hapur drejtuar Sokol Balles dhe Edi Ramës. Bardhi shkruan:
Të falënderoj shumë për “këshillën”, por më lejo të të informoj ty dhe përmes teje Edi Ramën, se unë kam vendosur t’i shërbej interesit publik, pra do të THELLOHEM në denoncime! Por si gjithmonë, me fakte e prova!
Fati i keq i Edi Ramës dhe kujtdo që leh për llogari të pushtetit të tij është që kurrë nuk ka ndodhur që denoncimet e mija me fakte e prova të kenë rezultuar të pavërteta. Propaganda i ka sulmuar për disa ditë, por nuk e ka mbuluar dot kurrë të VËRTETËN!
Prandaj, rri i qetë dhe mos u shqetëso për fundin tim! Ndërkohë, fillo e shqetësohu seriozisht për fundin e Edi Ramës dhe të kujtdo që leh çdo ditë për llogari të pushtetit të tij!”
