Protesta e 76-të qytetare kundër qeverisë është zhvilluar këtë të shtunë në Tiranë, këtë herë me pjesëmarrjen edhe të shqiptarëve të ardhur nga diaspora. Dhjetëra emigrantë nga vende të ndryshme iu bashkuan tubimit në kryeqytet, ndërsa përgjatë protestës u dëgjuan thirrjet “Rama jep dorëheqjen!” dhe “Revolucion!”.
Ndryshe nga mbrëmjet e mëparshme, pjesëmarrja e emigrantëve solli një prani më të shtuar të qytetarëve në bulevardin “Dëshmorët e Kombit”. Në foltoren e vendosur pranë Kryeministrisë, fjalimet që mbizotëruan ishin pikërisht nga shqiptarë që jetojnë jashtë vendit.
Një prej emigrantëve komentoi deklaratën e kryeministrit Edi Rama, i cili është shprehur se nuk jep dorëheqjen pasi ka një “kontratë” me qytetarët që e kanë votuar. Protestuesi pretendoi se kreu i qeverisë e ka “kontratën me bandën që ka vjedhur votat”, ndërsa i kërkoi të largohet nga detyra. Ai përdori gjithashtu tone të forta, duke paralajmëruar Ramën se, sipas tij, në të kundërt do të përballet me arrestimin “kudo që të ndodhet”.
Një tjetër emigrant solli në protestë historinë e fshatit të tij në qarkun e Kukësit, duke e lidhur atë me fenomenin e shpopullimit. Sipas tij, në fillim të viteve ’90 në fshat jetonin rreth 60 familje, ndërsa sot kanë mbetur vetëm tre, si pasojë e emigrimit të vazhdueshëm.
“Jemi një!” ishte një prej mesazheve që protestuesit lanë në bulevard gjatë tubimit të kësaj mbrëmjeje. Protesta u karakterizua gjithashtu nga prania e flamujve kuqezi dhe simboleve kombëtare.
Qytetarët vijuan më pas marshimin drejt Kryeministrisë, ndërsa organizatorët e cilësuan protestën e 76-të si një tubim me pjesëmarrje mbarëkombëtare.
