Pas 13 vitesh në vendin tonë rikthehet virusi “Ethet e Nilit Perëndimor” ku deri më tani janë 17 të infektuar dhe 3 qytetarë kanë humbur jetën.
Instituti i Shëndetit Publik ka dalë sot me këshilla për qytetarët se si të mbrohen nga virusi.
ISHP njofton se virusi i Nilit Perëndimor nuk përhapet nëpërmjet prekjes. Megjithatë sipas ISHP duhen respektuar masat higjeno-sanitare si më poshtë:
– Shmangni kontaktin me duar të zhveshura kur trajtoni ndonjë kafshë të ngordhur.
– Nëse po hidhni një zog të ngordhur, përdorni doreza ose qese plastike për ta vendosur trupin e pajetë në një kosh plehrash.
– Ndiqni gjithmonë udhëzimet për gatimin e plotë të mishit.
Infeksioni te njeriu është kryesisht rezultat i pickimeve nga mushkonjat e infektuara, të cilat infektohen kur ushqehen me zogj të infektuar. Virusi qëndron në natyrë nëpërmjet një cikli transmetimi mushkonja-zogj-mushkonja. Zogjtë janë rezervuarët bartës të virusit.
Por, edhe pse jep këshilla ISHP është e papërgatitur përballë këtij virusi. Njofton se virusi përhapet nga mushkonjat e infektuara, por nuk merr asnjë masë për parandalim. Hera e fundit që janë bërë dezinfektimet e zonave është viti 2019.
Nga një kërkim që ka bërë VNA.al, ISHP si institucion përgjegjës rezulton se tenderimet publike më të fundit që ka bërë për dezenfektimin e zonave janë në vitin 2019. Atë vit ISHP ka zhvilluar 38 kontrata publike për luftë kundër mushkonjave në vijën bregdetare me vlerë rreth 1 milionë euro.
Tenderat ishin marrëveshje kuadër me vetëm një kompani “NGR sh.p.k” dhe këto kontrata një vitë më parë ranë në sytë e drejtësisë. Madje në qershorin e vitit 2023, drejtoresha e këtij institucioni Silva Bino u thirr në SPAK për t’u pyetur për këtë rast, ndërsa dosja është ende në hetim.
Në një kërkim të bërë në APP dhe në Open Procurment, që prej 2019-ës nuk rezulton që ky institucion të ketë bërë tendera të tjerë për dezinfektimin e zonave.
ISHP në vend të japë këshilla sesi qytetarët të mbrohen nga pickimi i mushkonjave, do ishte më mirë të merrte masa për parandalim.
