Apeli i Posaçëm ka vendosur të kthejë për rigjykim në GJKKO çështjen penale ndaj të pandehurve për aferën e inceneratorit të Fierit. Gjykata urdhëroi prishjen e vendimit të mëparshëm të GJKKO-së dhe kërkoi rigjykimin e çështjes nga një trup gjykues tjetër.
Në lidhje me këtë aferë, Gjykata e Posaçme kishte shpallur fajtorë disa nga të pandehurit dhe kishte dhënë vendime pafajësie për të tjerë. Ish-ministri i Mjedisit, Lefter Koka, u dënua me 10 vite burg, por për shkak të gjykimit të shkurtuar dënimi iu reduktua në 6 vite e 8 muaj. Ish-deputeti socialist, Alqi Bllako, u dënua me 4 vite burg, ndërsa me gjykim të shkurtuar do të vuajë 2 vite e 8 muaj.
Ndërkohë, biznesmeni në arrati, Klodian Zoto, një nga pronarët de facto të inceneratorit të Tiranës, u dënua me 12 vite burg, nga të cilat duhet të vuajë 8 vite. Pesë nga të pandehurit, Gentian Zifla, Regan Merdani, Sabina Canameri, Azem Shateri, Florian Muça dhe Pëllumb Abeshi, u dënuan me shërbim prove.
Gjithashtu, Gjykata e Posaçme shpalli të pafajshëm zëvendëspresidentin e FSHF-së, Arben Dervishi, si dhe të pandehurit Arjola Kodra dhe Juri Imeraj.
