Gjykata e Posaçme Kundër Korrupsionit dhe Krimit të Organizuar (GJKKO) ka vendosur të ndajë çështjen e ish-kryebashkiakut të Durrësit, Vangjush Dako, nga pesë të akuzuar të tjerë, duke ia kaluar dosjen e tyre Gjykatës së Durrësit për shqyrtim. Ferzilet Hajdëri, Adnand Toçila, Diana Dedja, Bashkim Salillari dhe Hanza Reka, të cilët akuzohen për shpërdorim detyre, kërkuan gjykim të zakonshëm dhe ndarjen nga rasti i Dakos. Dosja e Dakos dhe të tjerëve, përfshirë Fiqiri Farrukun, Fatmir Ejupin dhe Adrian Bulkun, mbetet në juridiksionin e GJKKO.
Dako akuzohet se ka kryer veprën penale “shpërdorim detyre”, në dy raste. Njëri rast, ka të bëjë me ndërtimin e një pallati në Durrës 11 vite më parë, i cili u shemb nga tërmeti në nëntor të vitit 2019 dhe rasti tjetër ka të bëjë me një tender për ndërtimin e një shëtitoreje në vitet 2014-2015, që i ka shkaktuar buxhetit të shtetit një dëm prej 18 milionë lekë.
