Një jaht i regjistruar në emër të një shtetasi gjerman është gjetur i braktisur në breg të detit në zonën e Kavajës. Jahti është bosh dhe është konstatuar dy ditë më parë nga forcat e policisë.
Në mjetin lundrues është gjetur një pasaportë gjermane me gjeneralitetet F. R., 85 vjeç, si dhe janë sekuestruar një armë zjarri, celularë laptop dhe dokumenta të një shtetasi gjerman.
Policia është duke hetuar lidhur me misterin e gjetjes së jahtit. Nëse personi apo personat që ishin në bordin e tij mund të jenë mbytur në det, apo të jenë përpara një ngjarje kriminale.
Njoftimi i Policisë:
Shërbimet e Policisë Kufitare, gjatë monitorimit të zonës bregdetare, në territorin e fshatit Karpen, kanë konstatuar të ngecur në rërë, disa metra larg nga bregu, një mjet lundrues veliere, pa asnjë shtetas në bord.
Pas këqyrjes paraprake, shërbimet e Stacionit të Policisë Kufitare Spille kanë ushtruar kontroll të imtësishëm në bordin e mjetit lundrues.
Gjatë kontrollit në veliere, janë gjetur dhe sekuestruar 1 armë zjarri pistoletë tip “Walther”, 1 krehër pistolete, municion luftarak, 2 celularë, 1 laptop dhe dokumentet e mjetit lundrues.
Gjithashtu, në mjetin lundrues, është gjetur një pasaportë gjermane me gjeneralitetet F. R., 85 vjeç.
Nga verifikimet e kryera në bashkëpunim me Guardia di Finanza-n paraprakisht rezulton se mjeti lundrues është nisur nga Bari, Itali, me drejtim Kroacinë, fillimisht me lundrim normal dhe më pas me lëvizje të çrregullta.
Grupi hetimor i ngritur për këtë rast po bashkëpunon me Interpol Tiranën, për verifikimin e të dhënave të pasaportës që është gjetur në mjetin lundrues, me qëllim sqarimin e rrethanave të këtij rasti dhe përcaktimin e vendndodhjes së poseduesit të pasaportës, i cili dyshohet të jetë drejtuesi i mjetit lundrues.
Nga veprimet e para hetimore dyshohet se drejtuesi i velieres mund të ketë rënë në det, për shkak të dallgëve të larta të shkaktuara nga moti i keq.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
