Gjykata e Posaçme iu komunikoi masën e arrestit në shtëpi kryetarit të Bashkisë së Tropojës, Rexhë Byberaj dhe nënkryetarit Abedin Kërrnaja. Ndaj tyre rëndojnë dyshimet për veprën penale të shpërdorimit të detyrës, lidhur me ndërtimin e dy segmenteve rrugore, stacioni i Anijes Palç- Guri i Lules”, me një gjatësi 3.2km dhe rruga “Qafë Murrizi- Qafë Agri”, sipas SPAK në shkelje të ligjit. “Nga kryerja e aktit të ekspertimit ka rezultuar se hapja e rrugëve sipas projekteve të miratuara nga Këshilli Bashkiak është bërë në kundërshtim me aktet ligjore e nënligjore në fuqi duke sjellë një dëm prej 277. 611.520”, thotë SPAK.
REPUBLIKA E SHQIPËRISË GJYKATA E POSAÇME E SHKALLËS SË PARË PËR KORRUPSIONIN DHE KRIMIN E ORGANIZUAR NJOFTIM PËR MEDIAT 1. Prokuroria e Posaçme kundër Korrupsionit dhe Krimit të Organizuar, më datë 10.09.2024 ka paraqitur pranë Gjykatës kërkesën me objekt: “Marrjen në pyetje dhe verifikimin e kushteve të zbatimit të masës së sigurimit personal “Arrest në shtëpi”, parashikuar nga neni 237 i Kodit të Procedurës Penale, caktuar ndaj personave nën hetim Rexhe Byberi dhe Abedin Kerrnaja, të dyshuar për kryerjen e veprës penale “Shpërdorimi i detyrës”, e kryer në bashkëpunim, e parashikuar nga nenet 248 e 25 të Kodit Penal” . 2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarja Etleva Deda, bazuar në nenet 228, 229, 230, 232, 237, 244, 246 e 248 të K.Pr.Penale, me vendimin Nr. 116, datë 12.09.2024, vendosi: 1. Pranimin e kërkesës së Prokurorisë së Posaçme Kundër Korrupsionit dhe Krimit të Organizuar. 2. Vazhdimin e zbatimit të masës së sigurimit personal me karakter shtrëngues “Arrest në shtëpi”, parashikuar nga neni 237 i K.Pr.Penale, e caktuar me Vendimin nr. 112, datë 06.09.2024, të Gjykatës së Posaçme të Shkallës së Parë për Korrupsionin dhe Krimin e Organizuar, ndaj personit nën hetim Rexhe BYBERI, i dyshuar për kryerjen e veprës penale “Shpërdorimi i detyrës”, e kryer në bashkëpunim, e parashikuar nga nenet 248 e 25 të Kodit Penal. 3. Urdhërohet personi nën hetim Rexhe Byberi të mos largohet nga banesa e tij, me adresë: ****. 4. Vazhdimin e zbatimit të masës së sigurimit personal me karakter shtrëngues “Arrest në shtëpi”, parashikuar nga neni 237 i K.Pr.Penale, e caktuar me Vendimin nr. 112, datë 06.09.2024, të Gjykatës së Posaçme të Shkallës së Parë për Korrupsionin dhe Krimin e Organizuar, ndaj personit nën hetim Abedin KERRNAJA, i dyshuar për kryerjen e veprës penale “Shpërdorimi i detyrës”, e kryer në bashkëpunim, e parashikuar nga nenet 248 e 25 të Kodit Penal. 5. Urdhërohet personi nën hetim Abedin Kerrnaja të mos largohet nga banesa e tij, me adresë:**** . 6. Urdhërohet Prokuroria e Posaçme Kundër Korrupsionit dhe Krimit të Organizuar për ekzekutimin e këtij vendimi. 7. Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar Tiranë, brënda afatit ligjor. Rruga “Jordan Misja” Nr.1, 1057 Tiranë; tel/fax 0035542231527; www.gjp.gov.al Tiranë, më datë 12.09.2024 Gjykata e Posaçme e Shkallës së Parë për Korrupsionin dhe Krimin e Organizuar.
