Sipas një dosjeje të SPAK, Gentian Sula, një biznesmen, i ka dhënë para në dorë Fatime Kryemadhit, nëna e Monika Kryemadhit, për të shlyer kreditë bankare. Në dosje theksohet se Fatime Kryemadhi, e cila në atë kohë ishte pensioniste, ka përdorur 246,000 dollarë cash për të paguar një kredi prej 335,000 eurosh. Burimi i këtyre parave dyshohet se nuk ka qenë i ligjshëm dhe ka ngritur dyshime për përfshirje në veprimtari të paligjshme, përfshirë edhe korrupsion.
Fatime Kryemadhi ka deklaruar se ka siguruar këto para nga të ardhurat e familjes, duke përmendur qira nga prona në zonën e Shallvareve, punën e burrit të saj si kambist dhe të ardhurat nga djemtë e saj. Megjithatë, analiza financiare tregon një balancë negative prej 846,000 euro në vitin 2010. Organi i akuzës shpreh dyshime se kredi bankare janë marrë si një truk për të futur në sistemin bankar shuma parash me origjinë të dyshimtë.
Në dosje përmendet gjithashtu se Fatime Kryemadhi ka justifikuar shumën e parave duke përmendur disa huadhënës dhe deklarata noteriale të cilat janë hartuar pas hetimeve, por që nuk kanë ndonjë evidencë bankare që mbështet këto transaksione.
