Vrasja e Englantin Progës, babait të dy fëmijëve në Pogradec, ka shkaktuar një tronditje të fortë në opinionin publik, pasi dyshimet se policia është përpjekur ta fshehë ngjarjen e të shpëtojë autorët e krimit, sa vijnë e shtohen.
Gjithkush që ka patur në dorë, një celular apo është gjendur para një kompjuteri ka hedhur një status në facebook, duke shprehur revoltë, indinjim. Nuk kanë munguar as mallkimet e fyerjet.
Sigurisht të gjitha këto janë legjitime, kur jemi para faktit se babai i dy fëmijëve është rrahur deri në vdekje, se nuk pranoi të dorëzonte paratë e xhiros një gjobëvënësi, që flitet se ka lidhje të ngushta në polici e gjetkë.
Por përtej fjalëve, që I merr era, duhet të kërkojmë veprime konkrete.
1. Cili është punonjësi i sallës operative që mori I pari njoftimin?
2. Cili officer mbërriti I pari në vendngjarje? Kush është eksperti kriminalist që mblodhi provat e krimit? kush I pyeti dëshmitarët?
3. Kur u njoftua prokurorja e cështjes? Për cfarë vepre penale u referua ngjarja?
4. Përse në fillim u raportua si një ngjarje e zakonshme? Çfarë thonë ekspertët e mjekësisë ligjore për shkakun e vdekjes?
5. Cfarë u tha në seancën për caktimin e masës së sigurisë ndaj të dyshuarit si autor I vrasjes dhe 3 personave të tjerë që e mbështetën?
Për tu dhënë përgjigje gjithë këtyre pyetjeve nevojitet një hetim I thellë dhe I pandikuar. Nevojitet që zyrtarët lokalë të policisë të qëndrojnë larg dosjes, e hetimin e saj ta marrë në duar një grup I specializuar nga qendra.
Të garantohet prania e pëfaqësuesve të Avokatit të Popullit, por edhe avokatit të zgjedhur nga familja në një hetim që të identifikojë përgjegjësit dhe arsyet që u tentua manipulimi I ngjarjes.
Në të kundërt cdo fjalë të thënë sot e merr era. Përgjegjësit mund të vijojnë ta bëjnë sërish të njëjtin krimi, apo edhe më të rëndë, nëse nuk ndëshkohen me forcën e ligjit.
Institucionet e drejtësisë ja kanë këtë borxh Eglantinit, fëmijëve dhe familjes së tij. Ja kanë borxh shoqërisë që qytetarët të ndihen të sigurt.
