Presidenti i SHBA-së, Donald Trump, ka lëshuar një ultimatum të fortë ndaj Iranit, duke deklaruar se Teherani ka afat deri nesër në orën 08:00 për të arritur një marrëveshje, përndryshe do të përballet me pasoja të rënda.
Gjatë një prononcimi për gazetarët, Trump tha se negociatat po zhvillohen me mirëbesim, por paralajmëroi se nëse nuk arrihet një marrëveshje brenda afatit, do të ketë goditje ndaj infrastrukturës iraniane.
“Ata kanë kohë deri nesër në orën 8, do të shohim se çfarë do të ndodhë. Po negociojmë me mirëbesim. Pas orës 8 ata nuk do të kenë ura, stacione”, deklaroi presidenti amerikan.
Trump shtoi se Shtetet e Bashkuara ndodhen në një pozicion të favorshëm dhe paralajmëroi gjithashtu masa ekonomike, duke përmendur vendosjen e tarifave në lidhje me Ngushticën e Hormuzit.
“Ne jemi fitues, ata kanë humbur. Do të vendosim taksa (në Ngushticën e Hormuzit)”, u shpreh ai.
Presidenti amerikan paralajmëroi edhe për mundësinë e një përgjigjeje të ashpër ushtarake ndaj Iranit, duke theksuar se nuk dëshiron të ndërmarrë një veprim të tillë, por se ai mund të sjellë “shkatërrim total”.
“Do t’u duhen 100 vjet për të rindërtuar vendin e tyre”, deklaroi Trump.
Në përfundim, ai ritheksoi se administrata e tij nuk do të lejojë në asnjë rrethanë që Irani të pajiset me armë bërthamore, duke e cilësuar këtë si një vijë të kuqe për Shtetet e Bashkuara.
