Kreu i grupit parlamentar të PD, Gazment Bardhi, ka reaguar ashpër pas publikimit të një mesazhi në WhatsApp që pretendohet se i përket ministrit për Evropën dhe Punët e Jashtme, Ferit Hoxha, duke e cilësuar atë “skandaloz dhe fyes” ndaj shqiptarëve në Maqedoninë e Veriut.
Sipas Bardhit, në një komunikim të brendshëm është përdorur një gjuhë fyese ndaj shqiptarëve, ku në mesazh citohet fraza: “Po ata idiotët shqiptarë atje çfarë thonë?”. Mesazhi, sipas tij, lidhet me një diskutim ku përmendet edhe një artikull i gazetës “Nova Makedonija” për një deklaratë të kryeministrit, Edi Rama.
Bardhi e dënoi ashpër këtë gjuhë, duke theksuar se një qëndrim i tillë është i papranueshëm për një zyrtar të lartë dhe bie ndesh me normat kushtetuese. Ai e krahasoi retorikën me qëndrime të së kaluarës kundër shqiptarëve, duke përmendur figura historike si Nikola Pašić dhe Vasa Čubrilović.
Në përfundim të reagimit të tij, Bardhi kërkoi dorëheqjen e menjëhershme të ministrit Hoxha, duke e cilësuar çdo vonesë si të pajustifikueshme. Ai i bëri thirrje gjithashtu kryeministrit Rama që ta shkarkojë pa hezitim dhe të distancohet publikisht nga deklarata e pretenduar, të cilën e konsideroi si fyerje për shqiptarët dhe njollë për Republikën e Shqipërisë.
Nga ana tjetër, Ministria për Evropën dhe Punët e Jashtme ka hedhur poshtë kategorikisht akuzat. Zëdhënësi i saj, Alteo Hysi, deklaroi se mesazhet e publikuara janë të pavërteta dhe të fabrikuara.
“Publikimet e shpërndara në mediat sociale, të cilat pretendojnë të paraqesin komunikime të brendshme, janë të pavërteta dhe nuk kanë asnjë lidhje me realitetin. Komunikimi i servirur publikut është i paqenë”, u shpreh ai, duke shtuar se është shqetësuese që pretendime të tilla fabrikohen dhe më pas amplifikohen nga aktorë politikë.
Hysi theksoi gjithashtu se nuk është hera e parë që në hapësirën publike hidhen akuza të tilla ndaj përfaqësuesve të shërbimit të jashtëm, duke nënvizuar se këto pretendime cenojnë integritetin e institucioneve.
