Komisioni i Ligjeve ka miratuar me 9 vota pro dhe 3 kundër raportin për t’ia dërguar seancës plenare gjashtë kandidatët që plotësojnë kriteret për t’u votuar për Avokat të Popullit.
Kryetari i Partisë Demokratike, Sali Berisha, deklaroi se opozita nuk do të marrë pjesë në procesin e zgjedhjes në Parlament të Avokatit të Popullit. “Ne tërhiqemi totalisht nga procesi për zgjedhjen e Avokatit të Popullit, nuk marrim pjesë në farsë”, tha Berisha në një konferencë për mediat.
Deklarata vjen pasi të martën lista me emrat kandidatë për postin u miratua në Komisionin e Ligjeve me 9 vota pro dhe 3 kundër, duke kaluar kështu në seancën plenare për votim. Para nisjes së punës në komision, grupi parlamentar i PS u mblodh dhe vendosi të mos propozojë asnjë emër të ri, por të zgjedhë një nga emrat e propozuar nga opozita.
Për këtë post kandidatë janë: Adriana Kalaja, Aranita Brahaj, Besim Ndregjoni, Skënder Haluci, Tartar Bazaj dhe Endri Shabani.
Qartazi, PS duket e interesuar për emrin e Shabanit, duke e shndërruar procesin për zgjedhjen e Avokatit të ri të Popullit në një pazar politik, pa asnjë rezultat me interes për publikun.
Për më shumë se një orë, Komisioni i Ligjeve u përfshi nga debate pas vendimit të Partisë Demokratike për të tërhequr firmat për të gjithë kandidatët. Kryetari i Komisionit, Ulsi Manja, u shpreh se vullneti i demokratëve për të tërhequr firmat ka shkuar në protokollin e Kuvendit dhe do të jetë seanca e të enjtes ajo që do të vendosë nëse do të pranohen dhe rihapet procesi, apo do të vijojë zgjedhja e një prej gjashtë emrave.
Emrat që shkojnë në seancë:
• Adriana Kalaja
• Aranita Brahaj
• Besim Ndregjoni
• Skënder Haluci
• Tartar Bazaj
• Endri Shabani
