Kryetari i Partisë Demokratike, Sali Berisha, ka komentuar protestën e qytetarëve të Vlorës para bashkisë, të zhvilluar kundër mungesës së ujit prej pesë ditësh.
Berisha përshëndeti protestuesit, duke e cilësuar reagimin e tyre si dinjitoz dhe qytetar, ndërsa akuzoi zyrtarët lokalë për abuzim me fondet e furnizimit me ujë. Sipas tij, qytetarët e Vlorës janë përballur me padrejtësi të mëdha dhe kanë treguar guxim duke reaguar publikisht.
Ai theksoi se protesta e vazhdueshme është e vetmja rrugë përballë asaj që e quajti “regjim narkoshteti”, duke shtuar se ndryshimi mund të vijë vetëm nëse mijëra shqiptarë dalin çdo ditë në shesh.
Berisha u bëri thirrje qytetarëve të mos dorëzohen përballë lodhjes dhe zhgënjimit, duke theksuar se bulevardi është simboli i betejës dhe i fitores, ndërsa idealet, sipas tij, nuk maten me numra, por me guxim.
