Kreu PD, Sali Berisha ka deklaruar se opozita nuk do të tërhiqet nga protestat, ndërsa paralajmëroi një tjetër mobilizim në ditët e para të qershorit, që sipas tij do të jetë “kryengritja më e fuqishme që ka njohur Shqipëria”.
Berisha tha se fillimisht fokusi i opozitës do të jetë te referendumi për votëbesimin e kryetarit dhe Kuvendi Kombëtar, përpara vijimit të protestave.
Ndërkohë, para dhe pas paraqitjes në SPAK për zbatimin e masës “detyrim paraqitje”, Berisha nuk kurseu akuzat ndaj ish-kreut të SPAK, Altin Dumani.
Ai ngriti pretendime mbi pasurinë dhe mënyrën e deklarimit të një vile ku, sipas tij, banon Dumani, duke vënë në dyshim burimin e financimit dhe deklarimet e bëra gjatë procesit të vettingut. Berisha hodhi poshtë edhe pretendimet se objekti kishte shërbyer si kishë, duke e cilësuar këtë një “mashtrim”.
