Qendra tregtare Toptani në Tiranë u evakuua mbrëmjen e sotme pas një alarmi për bombë të marrë përmes një emaili të dërguar në adresën e menaxherëve të sigurisë.
Sipas informacionit paraprak të policisë, rreth orës 20:10 shtetasi A.D., i cili punon si shef i sigurisë në qendrën tregtare, ka njoftuar sallën operative të Drejtorisë Vendore të Policisë Tiranë se në adresën e tij të emailit kishte mbërritur një mesazh ku thuhej se në qendrën tregtare ishte vendosur një sasi lënde plasëse që do të shpërthente në orën 20:30.
Menjëherë pas njoftimit, qendra tregtare është evakuuar, ndërsa në vendngjarje kanë mbërritur shërbimet e Policisë, Forcat Xheniere dhe strukturat e Antiterrorit.
Pas kontrollit të kryer në ambientet e qendrës tregtare, autoritetet kanë bërë të ditur se nuk është konstatuar asnjë objekt apo lëndë e paligjshme.
Grupi hetimor po punon për identifikimin e personit që ka dërguar emailin dhe për sqarimin e plotë të rrethanave të ngjarjes.
