Gjatë seancës së zhvilluar këtë të enjte në Gjykatën e Posaçme për Ilir Metën dhe ish-politikanen Monika Kryemadhi, ish-presidenti pretendoi se përgjohej në burg gjatë takimeve me avokatin dhe kërkoi që ky pretendim të verifikohej.
Në nisje të seancës, Meta kërkoi së pari të nxirrej nga kafazi i xhamtë dhe të ulej krah avokatit, si dhe të lejoheshin kamerat të transmetonin procesin gjyqësor. Më interesante ishte kërkesa për verifikimin e pajisjeve të përgjimit në ambientet e paraburgimit ku takohet me avokatin mbrojtës Bujar Musta.
Lidhur me këto kërkesa, prokurori Arben Kraja tha se nuk ishte dakord me lejimin e kamerave, ndërsa u shpreh se verifikimi i pretendimit për pajisje përgjimi në paraburgim ishte jashtë kompetencës së SPAK-ut. Sa i përket kërkesës për nxjerrjen nga kafazi, prokuroria ia la vendimin gjykatës.
Kreu i trupit gjykues, Erion Bani, rrëzoi kërkesat për transmetimin e drejtpërdrejtë të seancave dhe për nxjerrjen nga kafazi. Për pretendimin se në paraburgim kishte pajisje përgjimi, Bani deklaroi se do t’ia përcillte shqetësimin Drejtorisë së Përgjithshme të Burgjeve.
