Një pub britanik mund të duket i çrregullt dhe informal, por në të vërtetë funksionon sipas një sërë rregullash të pashkruara: nga radhët e padukshme te mënyra si porositen pijet, blerja me “raunde” dhe sinjalet që tregojnë se mbrëmja ka mbaruar.
Një shembull tipik është pub-i viktorian The Guildford Arms pranë rrugës Princes Street në Edinburg, ku në mbrëmjet e fundjavës turma e klientëve mblidhet pranë banakut për të porositur birrë, verë apo whisky. Për një vizitor të huaj mund të duket si kaos, por në fakt gjithçka ndjek një etikë të mirëpërcaktuar.
1. Nuk ka radhë – por ka rend
Në një pub britanik zakonisht nuk ekziston një radhë e dukshme. Njerëzit afrohen te banaku dhe presin. Megjithatë ekziston një “radhë mendore” që barmeni dhe klientët e tjerë e mbajnë mend.
Rregulli është i thjeshtë: mos shty përpara dhe mos u përpiq të marrësh vendin e dikujt tjetër. Qëndro aty ku mund të të shohë stafi dhe prit radhën.
2. Porosit te banaku
Ndryshe nga shumë vende të tjera, në shumicën e pub-eve britanike nuk ka shërbim në tavolinë. Edhe nëse je ulur, duhet të shkosh vetë te banaku për të porositur, përveç rasteve kur stafi të thotë ndryshe.
3. Mos u bëj “round dodger”
Një traditë e rëndësishme në pub-et britanike është blerja e pijeve me radhë për gjithë grupin. Njëri blen një raund për të gjithë, pastaj dikush tjetër merr radhën.
Nëse refuzon vazhdimisht të paguash raundin tënd, rrezikon të konsiderohesh koprrac.
4. Bakshishi nuk të sjell shërbim më të shpejtë
Në pub-et britanike bakshishi nuk është i detyrueshëm si në disa vende të tjera. Nuk duhet të tundësh para apo kartë krediti për të tërhequr vëmendjen e barmenit. Ndonjëherë klientët thonë thjesht “mbaje kusurin”, por kjo mbetet gjest i vogël dhe jo rregull.
5. Pub-i është edhe vend komuniteti
Pub-i nuk është vetëm vend për të pirë. Shpesh është një qendër sociale e lagjes, ku njerëzit bisedojnë, luajnë kuize apo dëgjojnë muzikë live.
Prandaj pritet që të sillesh me respekt, të mos bërtasësh dhe të mos përdorësh telefonin me zë të lartë.
6. Edhe ushqimet kanë rregulla
Snacks-et në pub kanë gjithashtu etikën e tyre. Nëse një paketë patatinash apo kikirikësh vendoset në mes të tavolinës, nënkuptohet se duhet të ndahet me të gjithë.
7. Dije kur mbaron mbrëmja
Rreth 15 minuta para mbylljes bie sinjali i “last orders”, që do të thotë se është mundësia e fundit për të porositur. Kur bie zilja përfundimtare, klientët pritet të largohen pa zhurmë dhe pa debate.
Në fund, kultura e pub-it britanik mbështetet te një ide e thjeshtë: respekt për të tjerët dhe për komunitetin. Nëse ndjek këto rregulla të pashkruara, do të ndihesh si vendas – edhe në pub-in më të vjetër të Britanisë.
