Presidenti i Polonisë, Karol Nawrocki, ka nënshkruar zyrtarisht miratimin për vendosjen e trupave shtesë të NATO-s në territorin polak. Ky dislokim bëhet në kuadër të operacionit të quajtur “Roja Lindore” dhe konsiderohet një masë përforcuese e sigurisë kombëtare përballë kërcënimeve në rritje nga lindja, sidomos pas incidenteve të fundit me dronë rusë që kanë shkelur hapësirën ajrore polake. Sipas njoftimeve zyrtare të mediave polake, “Presidenti i Polonisë, Karol Nawrocki, nënshkroi një dekret për të dhënë pëlqimin për praninë në territorin e Polonisë të kontingjentit të forcave të huaja nga shtetet anëtare të NATO-s, në kuadër të përforcimit të Republikës së Polonisë në kuadër të operacionit ‘Roja Lindore’.”
Vendimi vjen në një periudhë tensioni të shtuar midis NATO-s dhe Rusisë, pas ndërhyrjes së avionëve polakë dhe të aleatëve për rrëzimin e dronëve që shkelën kufirin ajror të Polonisë më 10 shtator. Kryeministri polak, Donald Tusk, ka paralajmëruar se situata është më e rrezikshmja që nga Lufta e Dytë Botërore dhe ka kërkuar konsultime urgjente me aleatët e NATO-s në bazë të Nenit 4 të Traktatit të Aleancës. Forcat aleate, përfshirë avionë luftarakë F-35 nga Holanda dhe avionë për mbikëqyrje ajrore të NATO-s, morën pjesë në operacionin për mbrojtjen e hapësirës ajrore të Polonisë. Ndërkaq, Ministria e Mbrojtjes e Rusisë mohon se objektivat e operacionit ndodhën në territorin polak dhe shpreh gatishmërinë për të zhvilluar bisedime me palën polake.
