Kur ishte vetëm shtatë vjeç, Mattia Villardita kuptoi çfarë do të thoshte të jetoje në spital: zhurma metalike e serumëve, dritat që nuk fikeshin kurrë dhe netët e gjata mes dhimbjes dhe frikës. I lindur me keqformime të rralla në këmbë dhe në krah, ai iu nënshtrua plot 17 operacioneve kirurgjikale në spitale të ndryshme italiane.
Fëmijëria e tij kaloi mes korridoreve të spitalit, fizioterapisë dhe rikuperimeve të dhimbshme. Në ato vite, shoku i tij më i madh ishte një komik i vjetër i Spider-Man, që ia kishte dhuruar gjyshi. “Shpresoja që Spiderman të hynte nga dritarja dhe të më merrte përdore”, kujton ai sot.
Vite më vonë, pasi nuk mundi të realizonte ëndrrat e tij për t’u bërë sportist apo ushtarak për shkak të problemeve shëndetësore, Mattia bëri diçka të papritur: bleu një kostum Spiderman dhe vendosi të rikthehej në spitalet ku kishte vuajtur, por këtë herë jo si pacient.
Që prej vitit 2017, ai viziton repartet pediatrike i veshur si superheroi i famshëm, për t’u dhënë kurajë dhe buzëqeshje fëmijëve të shtruar në spital. “Sa herë hyj në një dhomë, mendoj për fëmijën që kam qenë vetë”, thotë ai.
Në vitin 2021, presidenti italian Sergio Mattarella e nderoi me titullin “Kalorës i Meritës” për altruizmin dhe punën e tij me fëmijët e sëmurë.
Sot, Mattia ndiqet nga qindra mijëra njerëz në rrjetet sociale dhe është zgjedhur nga Sony si përfaqësues italian për promovimin e filmit të ri “Spider-Man: Brand New Day”.
Por pavarësisht vlerësimeve, ai vazhdon të thotë diçka që tingëllon si një lutje: “Do të doja që një ditë ky kostum të mos ishte më i nevojshëm. Por derisa spitalet të jenë plot me fëmijë që vuajnë, unë do të jem aty.”
