Qeveria izraelite miratoi mbrëmë fazën e parë të planit të paqes të propozuar nga Donald Trump për Gazën, pas nënshkrimit të marrëveshjes mes Izraelit dhe Hamasit një ditë më parë. Në një deklaratë zyrtare, zyra e kryeministrit të Izraelit tha se korniza përfshin lirimin e të gjithë pengjeve – të gjallë dhe të vdekur.
Presidenti amerikan Trump e quajti marrëveshjen “një përparim të rëndësishëm”, duke theksuar se ajo do të çojë drejt “një paqeje të qëndrueshme” në rajon.
Ndërkohë, një zyrtar i lartë i Hamasit deklaroi fundin e luftës në Gaza dhe fillimin e një armëpushimi të përhershëm. Trupat izraelite pritet të tërhiqen sot në vijën e rënë dakord, megjithëse lirimi i pengjeve izraelite dhe i të burgosurve palestinezë pritet të ndodhë në fillim të javës së ardhshme.
Në Gaza, lajmi është pritur me lehtësim dhe kujdes. “Ne ndiheshim të lumtur, por dhimbja dhe vuajtja mbeten,” tha Ibrahim Shurrab nga Khan Younis. Ndërsa një banore tjetër, Nevin Qudeeh, shtoi se kjo ishte “ndjenja e parë e vërtetë e lehtësimit që nga fillimi i luftës”, ndërsa ende pret të kthehet në shtëpi.
