Festime të mëdha kanë shpërthyer si në Gazë ashtu edhe në Izrael, pasi presidenti amerikan Donald Trump njoftoi se grupi Hamas ka pranuar “fazën e parë” të një plani për paqe. Marrëveshja synon t’i japë fund luftës dyvjeçare dhe të mundësojë lirimin e disa pengjeve që mbahen aktualisht në Gazë.
Në qytetin Han Junis, turma palestinezësh u mblodhën pranë spitalit Nasser, duke brohoritur dhe duartrokitur në shenjë gëzimi. “Këto janë momente historike,” u shpreh një banor lokal, ndërsa flamuj palestinezë valëviteshin në rrugë.
Ndërkohë, në Tel Aviv, nëna e pengut izraelit Matan Zangauker festoi lajmin për lirimin e të birit, duke falënderuar popullin izraelit, forcat e armatosura dhe presidentin e SHBA-së për rolin e tyre në arritjen e kësaj marrëveshjeje.
Autoritetet ndërkombëtare e kanë cilësuar zhvillimin si një hap të rëndësishëm drejt stabilitetit në rajon, ndërsa fazat e tjera të planit pritet të diskutohen në ditët në vijim.
