Një artist libanezo-francez ka paraqitur një padi në një gjykatë në Paris për bombardimin izraelit të shtëpisë së familjes së tij në Liban, sulm që vrau prindërit e tij dhe një punonjëse shtëpie. Ai pretendon se sulmi mund të përbëjë një krim lufte.
Padia u depozitua të martën në njësinë franceze për krimet e luftës dhe konsiderohet një rast i rrallë ku një individ kërkon ndjekje penale për një bombardim izraelit. Po ashtu, është hera e parë që një gjykatë franceze merr në shqyrtim një çështje të tillë lidhur me bombardimet e Izraelit në Liban.
Artistit Ali Cherri i vdiqën prindërit, Mahmoud Naib Cherri, 86 vjeç, dhe Nadira Hayek, 76 vjeç, si dhe punonjësja e tyre Birki Negesa, kur shtëpia e familjes në qendër të Bejrutit u bombardua nga Izraeli pak orë para hyrjes në fuqi të armëpushimit mes Hezbollahut dhe Izraelit më 26 nëntor 2024. Në sulm u vranë gjithsej shtatë civilë.
“Në kërkojmë që të hapet një hetim për të kuptuar saktësisht çfarë ndodhi, që ky sulm të emërtohet si krim lufte ndaj civilëve dhe, shpresojmë, të identifikohen përgjegjësit”, tha Cherri.
Sipas një hetimi të organizatës Amnesty International, në momentin e sulmit nuk kishte prova për praninë e një objektivi ushtarak në zonë dhe bombardimi duhet të hetohet si krim lufte.
Organizata investigative Forensic Architecture, që ndihmoi në përgatitjen e padisë, krijoi një model 3D të ndërtesës së goditur dhe identifikoi municionin e përdorur si një bombë e drejtuar GBU-39, prodhim amerikan, e përdorur shpesh nga Izraeli në sulmet në Gaza dhe Liban.
Sipas tyre, analiza e sulmit dhe përdorimi i një municioni të drejtuar tregojnë se goditja ishte e qëllimshme dhe se përgjegjësia i takon ushtrisë izraelite.
Amnesty International e ka cilësuar këtë padi në Francë si një “mundësi të rrallë” për të shqyrtuar veprimet e Izraelit në një gjykatë europiane, në një kohë kur ai është akuzuar shpesh për shkelje të rënda të së drejtës humanitare ndërkombëtare në Liban dhe Gaza.
