Një ngjarje e rëndë ka ndodhur pasditen e djeshme në Halkidiki të Greqisë, ku një 22-vjeçar shqiptar ka plagosur me thikë një oficer policie 49-vjeç, të cilit, sipas dëshmitarëve, i kishte zënë pritë poshtë shtëpisë.
Sipas raportimeve nga mediat vendase, të dy banonin në të njëjtën ndërtesë, ku oficeri jetonte me familjen dhe kishte gjithashtu të vendosur biznesin e zdrukthtarisë që e administronte bashkë me vëllain. Burime pranë hetimeve bëjnë me dije se ky nuk ishte incidenti i parë i natyrës kërcënuese nga 22-vjeçari, i cili më herët kishte tentuar ta përballej disa herë oficerin.
Një banor i zonës që ndodhej pranë vendit të ngjarjes tha se i riu shqiptar e kishte pritur oficerin të paktën 2-3 herë më parë jashtë banesës, duke shfaqur sjellje të dyshimta. Mësohet se sulmi i fundit përfundoi me përdorimin e një thike, me të cilën autori plagosi oficerin. Fatmirësisht, ky i fundit ka marrë vetëm lëndime të lehta dhe është transportuar në Spitalin e Poligjiros për trajtim mjekësor.
Burime të afërta me hetimin tregojnë se 22-vjeçari është i përfshirë në aktivitetin e trafikut të drogës, ndonëse nuk rezulton të ketë pasur konflikte personale me policin.
I riu u arrestua menjëherë pas ngjarjes dhe ndaj tij rëndojnë akuzat për plagosje të rëndë dhe shkelje të ligjit për armët./ Top Channel
