Prokuroria e Tiranës ka kërkuar zyrtarisht nga autoritetet libaneze ekstradimin e 49-vjeçarit Fadi Alwan, i cili akuzohet për vrasjen e vajzës së tij, 24-vjeçares Rayan Alwan. Krimi i rëndë ndodhi në Tiranë gjatë një udhëtimi turistik të babait dhe vajzës nga Gjermania drejt Shqipërisë. Sipas hetimeve, ata kishin marrë një shtëpi me qira dhe ishin prezantuar si çift. Pesë ditë më vonë, trupi i pajetë i vajzës u gjet i masakruar me armë të ftohtë, ndërsa autori ishte larguar nga vendi i ngjarjes.
Arrestimi i Alwan u krye në Liban dhe u bë i ditur përmes Interpolit. Menjëherë pas kësaj, Gjykata e Tiranës vendosi masën e arrestit në mungesë ndaj tij, për akuzën e vrasjes për shkak të marrëdhënieve familjare. Prokuroria ka theksuar se kërkesa për ekstradim bazohet në marrëveshjen e reciprocitetit mes dy vendeve.
Ndërkohë, përmes një letërporosie është kërkuar edhe ndihma e autoriteteve gjermane për të marrë dëshmi nga të afërmit e viktimës, për të zbardhur më tej rrethanat e konfliktit familjar. Në mesin e personave që pritet të pyeten është edhe nëna e të ndjerës.
Trupi i Rayan Alwan është tërhequr tashmë nga të afërmit e saj, të cilët presin drejtësi nga autoritetet shqiptare dhe libaneze.
