Gjatë raportimit në Kuvend kreu i SPAK, Altin Dumani, është pyetur nga deputetja Flutura Açka sa persona të dënuar nga GJKKO kishin përfituar nga amnistia penale, ku u bë bashkë opozita teknike me mazhorancën.
Dumani pohoi se 117 persona në total kanë përfituar nga amnistia penale, ku 40 prej tyre u përjashtuan nga dënimi, 65 nga zbritja e dënimit dhe 12 nga ndjekja penale.
“Ne nuk kemi asnjë kompetencë që të vlerësojmë veprimtarinë e një institucioni tjetër, është në të drejtën e tij të miratojë amnistin, nga ky ligj kanë përfituar subjekte të cilët janë dënuar nga gjykatat e posaçme, 40 persona përjashtim nga dënimi, 65 nga zbritja e dënimit, 12 nga ndjekja penale, (pra janë pushuar hetimet) – pra kuvendi ka kompetencën për të miratuar apo jo një amnisti. SPAK është institucion kushtetues i pavarur, garanton ligji pavarësinë e tij. Ishte vullnet politik në 2016 për reformën, është vullnet politik për të marrë masa të tjera që mund të afektojnë SPAK” - tha Dumani.
Deklarata e kreut të Prokurorisë së Posaçme rrëzon poshtë të gjitha pretendimet e mazhorancës dhe deputetëve në grupin e Berishës që shpreheshin para se ta miratonin në Parlament, se nga kjo amnisti nuk përfitonin të dënuar nga SPAK dhe GJKKO.
