Për kontejnerët me mbetje toksike ka reaguar edhe Dogana e Kosovës, çështje për të cilën Prokuroria e Durrësit ka nisur hetimet. Në reagimin e tyre thuhet se në të dhënat që disponojnë për eksportet nuk ka dërgesa me mbetje të rrezikshme. Ndërsa dyshimet e eksporteve të ngritura nga Dogana e Durrësit, ajo e Kosovës shprehet se janë koncentrate zinku dhe jo mbetje. Për këtë ata thonë se kanë marrë edhe testet nga kompania që i ka eksportuar.
“Dogana e Shqipërisë i ka referuar këto mallra si koncentrat zinku, të eksportuara nga një kompani e regjistruar në Kosovë drejt një kompanie zvicerane. Duke qenë se Dogana e Kosovës nuk ka qasje në ndonjë raport zyrtar është e vështirë të përcaktojmë saktësinë e rrjedhës së ngjarjeve, përderisa nga kërkimi në të dhënat tona të eksportit, kemi konstatuar se:
– Nuk ka eksport të mbeturinave të rrezikshme që i përgjigjen dërgesave të natyrës së atyre të raportuara në media.
– Janë identifikuar eksporte qe referohen në deklaratën për media nga Dogana e Shqipërisë, dhe produkti në fjalë, siç edhe është theksuar nga Dogana e Shqipërisë është koncentrat zinku dhe jo mbetje. Për këtë produkt pronari i subjektit eksportues ka ofruar test raportet nga kompania e mirënjohur e testimeve te industrisë SGS” - thuhet nga Dogana e Kosovës.
Për të qenë sa më e qartë me publikun, në reagimin e saj Dogana e Kosovës shpjegon se koncentratet e zinkut janë të nxjerra nga miniera e Trepçës dhe janë eksportuar në vazhdimësi. Për këtë arsye, Dogana e Kosovës thotë se lënda e parë nëse i referohemi Konventës së Bazelit nuk quhet mbetje e rrezikshme.
“Koncentratet e zinkut janë eksportuar në vazhdimësi dhe për dallim nga raportimi i mediave shqiptare dhe ndërkombëtare, nuk bëhet fjalë për mbetje (electric arc furnace dust siq i referohet Bloomberg), por për koncentrat zinku të nxjerrë nga Trepça. Ky institucion thotë se produkti koncentrat zinku i eksportuar ka përbërje të koncentruar të Zinkut (Zn), Hekurit (Fe), Plumbit (Pb) etj, dhe si i tillë nuk klasifikohet si mbetje. Legjislacioni që rrjedhë nga Konventa e Bazelit për Mbetjet e Rrezikshme aplikohet tek mbetjet dhe jo tek lënda e parë që eksportohet. Eksporte te ngjashme bëhen vazhdimisht nga industria e Republikës së Kosovës dhe nuk ka pasur ndonjëherë pretendime për klasifikim të këtyre produkteve si mbetje të rrezikshme”, shton dogana.
Por përtej sqarimit, Dogana e Kosovës nuk e ka lënë me kaq pasi thotë se ka hapur një hetim të gjerë mbi këtë çështje dhe do të shqyrtojë të gjitha çështjet e ngritura me këto dërgesa dhe do t’i bëjë publike.
Kujtojmë se ngarkesa për të cilën bëhet fjalë është ajo e Prillit që ka mbërritur në portin e Guqngzhu në Kinë.
