Zbardhen detaje të reja lidhur me organizatën kriminale të drejtuar nga Salvatore alias Shpëtim Aliu, që furnizonte me kokainë disa grupime kriminale. Një prej këtyre grupimeve drejtohej nga Sokol Bibaj, për të cilin është firmosur urdhër arrest nga SPAK.
Nga hetimet ka rezultuar se Sokol Bibaj ka qenë i përfshirë në trafikimin e sasisë prej 4.1 tonë kokainë, me datë 16 dhjetor 2020, e sekuestruar në portin e Roterdamit në Holandë, ngarkesë e cila ishte dërguar nga Salvatore alias Shpëtim Aliu. Sokol Bibaj, sipas hetuesve, ka qenë në rolin e porositësit. Po ashtu rezulton se Bibaj ka qenë i përfshirë edhe në trafikimin e sasisë prej 1 ton e 50 kg kokainë, e sekuestruar në Kolumbi më 3 shkurt 2021, ngarkesë e dërguar nga Salvatore Aliu. Edhe në këtë rast Bibaj ka qenë porositës.
Hetuesit sqarojnë se sa i përket organizimit të trafikimit të ngarkesave të konsiderueshme me kokainë nga Ekuadori drejt Europës, Sokol Bibaj identifikohet si porositës i ngarkesave me kokainë te Salvatore alias Shpëtim Aliu. Ky i fundit mundësonte nisjen e sigurt të ngarkesave me kokainë nga Ekuadori drejt Europës.
Me interes janë sipas hetuesve komunikimet e datës 30 tetor 2020 të Salvatore Shpëtim Aliut dhe Sokol Bibajt, të cilët diskutojnë mbi kapacitetet respektive që kanë në trafikun e drogës.
Salvatore alias Shpëtim Aliu i tregon Bibajt se edhe pse më parë ka vuajtur shumë, aktualisht gjendet në një pozicion shumë të mirë dhe zakonisht për çdo javë nis 1 ose 2 tonë kokainë. Bibaj i përgjigjet se vetë bën edhe 8 tonë në javë.
Gjatë një bisede mes tyre, Sokol Bibaj shprehet se “do e drogojnë Europën”, duke qenë të vetëdijshëm për sasitë e larta të kokainës që kanë sjellë dhe do të sjellin në Europë.
Nga hetimet është provuar se Sokol Bibaj dhe vëllezërit e tij i kanë pastruar paratë e kokainës në ndërtim në Shqipëri. Ndërsa organizata e drejtuar nga Shpëtim Aliu furnizonte me kokainë disa grupe që drejtoheshin nga Eldi Dizdari, Dritan Gjika, Armando Pacani, etj.
Në total, SPAK firmosi 10 urdhër-arreste, ndërsa sekuestroi 150 milionë euro pasuri.
