Dëmtimi i një kablloje fibre optike shkaktoi ndërprerje të internetit në Finlandë. Siç informoi sipërmarrja e të dhënave dhe komunikimit global GlobalConnect, bëhet fjalë për një linjë tokësore midis Finlandës dhe Suedisë, në të cilën është gjetur dëmi në dy vende të ndryshme.
Sipas gazetës suedeze Dagens Nyheter, dëmi u gjet në territorin finlandez, rreth kryeqytetit Helsinki. Kabllot me sa duket u shkëputën gabimisht gjatë punës në ndërtim, tha Autoriteti Finlandez i Transportit dhe Komunikimit (Trafficom). Dëmtimi tashmë u riparua, u tha më tej.
Në një reagim të parë, Ministri suedez i Mbrojtjes Civile Carl-Oskar Bohlin kishte përmendur një akt të mundshëm sabotimi. Ministri finlandez i Transportit dhe Komunikacionit Lulu Ranne kishte shkruar në platformën në X se autoritetet po hetonin çështjen. "Po e marrim seriozisht situatën”, përfundonte mesazhi i tij. Sidoqoftë, policia finlandeze theksoi se ata nuk kishin nisur ndonjë "hetim penal".
Dëmtimi i kabllove të të dhënave edhe në nëntor
Në nëntor brenda një kohe të shkurtër u dëmtuan gjithashtu dy kabllo të fibrave optike në Detin Baltik. Njëra ishte një kabllo që lidh Suedinë me Lituaninë dhe një tjetër që lidh Suedinë me Gjermaninë.
Në të dy rastet, shkaku nuk është ende i qartë. Politikanë nga vende të ndryshme kanë shprehur dyshimin se shkatërrimi i kabllove mund të kishte qenë një sulm hibrid. Ministri gjerman i Mbrojtjes Boris Pistorius (SPD) gjithashtu bëri hipotezën se mund të ishte sabotim në të dy rastet.
Autoritetet suedeze po hetojnë një sabotim të mundshëm. Hetuesit përqendrohen në një anije kineze të quajtur "Yi Peng 3", e cila kaloi në vendet e prekura të kabllove në atë kohë.
NATO ndalet te sulmet hibride të mërkurën
Pas dëmtimit të kabllit dje në Finlandë, Sekretari i Përgjithshëm i NATO -s Mark Rutte tha se ishte urgjente për 32 vendet anëtare për të mbrojtur më mirë kabllot e të dhënave nga sabotimi i mundshëm. Sapo NATO do të mësojë origjinën e dëmit, ajo do të shprehet për këtë temë.
Rutte theksoi se në kontekstin e luftës së agresionit rus në Ukrainë, janë shtuar gjithashtu rastet e sabotimit, shantazhi me energjinë dhe sulmet kibernetike. Rusia nuk është e vetmja që përdor mjete të tilla, sipas informacionit të NATO -s, Kina gjithashtu po ndërhyn gjithnjë e më shumë. Sipas tij, ministrat e Jashtëm të NATO -s duan të diskutojnë këtë temë të mërkurën.
DW
