Në seancën e sotme plenare në Kuvend, deputeti Agron Shehaj ka sjellë në vëmendje një rast të rëndë, atë të vdekjes së një qytetari 39-vjeçar për shkak të mungesës së ilaçeve në spitalin e Onkologjikut. Në fjalën e tij, Shehaj theksoi se zgjodhi të flasë në emër të një babai që kishte humbur të birin, duke kërkuar përgjigje konkrete nga Ministrja e Shëndetësisë, Albana Koçiu.
Shehaj vazhdoi me akuza të rënda për korrupsion, duke pretenduar se fondet për ilaçet janë përdorur për pasuri personale. “Fusni dorën në çantën tuaj zonja ministre, keni paratë e ilaçeve, i keni bërë vila, resorte, u bëtë milionere,” u shpreh ai.
Ministrja Koçiu nuk i dha asnjë përgjigje akuzave të deputetit por vijoi me propagandë duke e kritikuar atë për shfrytëzimin e tragjedive për përfitime politike.
Diskutimi për mungesën e ilaçeve nuk duket se ngjalli interesin e deputetëve të Partisë Demokratike, të cilët u larguan nga salla sapo nisi interpelanca. Për më shumë se dy orë, nga vendi dhe foltorja nuk ndaluan së foluri apo bërtituri me ankesa të vazhdueshme për çfarë kishte ndodhur në Komisionin e Sterilizimit. Megjithatë, akuzat për një çështje aq të ndjeshme sa mungesa e ilaçeve në spitalin Onkologjik dhe përgjegjësia e Ministrisë për të dhënë shpjegime, duket se nuk tërhoqën vëmendjen e tyre.
