Presidenti i SHBA-së, Donald Trump, i tha BBC-së se “çfarëdo që po bëj duket se po funksionon shumë mirë”, kur u pyet për kërcënimet e tij ndaj Iranit.
Redaktorja për Amerikën e Veriut në BBC, Sarah Smith, foli shkurt me presidentin në një telefonatë, gjatë së cilës e pyeti nëse deklarata e tij më herët këtë muaj se “një qytetërim i tërë do të vdesë sonte” ishte një kërcënim për përdorimin e armëve bërthamore kundër Iranit.
“Ana tjetër po vdes për të bërë një marrëveshje,” u përgjigj ai. “Kështu që çfarëdo që po them apo çfarëdo që po bëj, duket se po funksionon shumë mirë. Faleminderit shumë.”
Për NATO-n, Trump tha se SHBA “nuk kishte fare nevojë për ta” në luftën me Iranin, por shtoi se ata “duhej të kishin qenë aty”.
Kur Smith e pyeti pse atëherë ai donte që ata t’i bashkoheshin luftës, Trump u përgjigj: “Sepse doja të shihja nëse do të përfshiheshin apo jo.”
Ai tha se SHBA “gjithmonë ka qenë për” Mbretërinë e Bashkuar dhe NATO-n, por kritikoi Britaninë për mosbërjen e “të paktën një përpjekjeje minimale dhe të paktën disa fjalë më të mira”.
Trump shtoi se “shumë njerëz nga Mbretëria e Bashkuar” i kanë bërë të ditur administratës së tij se sa “jashtëzakonisht i keq” ishte vendimi i Londrës për të mos u përfshirë në luftë (Britania ka lejuar vetëm përdorimin e bazave të saj për sulme ajrore “mbrojtëse”).
Më herët gjatë telefonatës, Trump tha se beson se marrëdhënia e tij me kryeministrin britanik Keir Starmer mund të “rikuperohet” nëse ai “hap Detin e Veriut” dhe nëse politikat e tij të emigracionit “bëhen më të forta”, por shtoi: “Nëse nuk e bën këtë, nuk mendoj se ka ndonjë shans.”
