Pentagoni ka nisur një nga operacionet më të rrezikshme të kërkim-shpëtimit ushtarak, të njohur si misioni “Sandy”, për të rikuperuar pilotët e një avioni luftarak F-15E amerikan që u rrëzua në territorin iranian. Operacioni po zhvillohet në rajonin e Khuzestanit, një zonë e ashpër pranë kufirit me Irakun dhe pranë Gjirit Persik.
Piloti i parë është shpëtuar pas disa orësh, por për të dytin është organizuar një operacion i madh me dhjetëra avionë dhe helikopterë, ndërsa forcat iraniane dhe milicitë lokale po e kërkojnë gjithashtu, të nxitura edhe nga shpërblimi i premtuar nga regjimi iranian për kapjen e tij.
Që nga lufta e Vietnamit, misionet e këtij lloji njihen si “Sandy” dhe u besohen njësive më të specializuara të aviacionit amerikan. Piloti i rrëzuar mund të mbështetet vetëm te një transmetues emergjence i lidhur me sediljen e katapultimit, një radio e koduar dhe një paketë minimale mbijetese: pistoletë, disa karikatorë, pajisje mjekësore dhe pak ushqim.
Operacioni i shpëtimit përfshin helikopterë Blackhawk dhe Sea Stallion, avionë transporti Hercules “Combat King” dhe avionë sulmues A-10 Warthog, që fluturojnë në lartësi shumë të ulët për të shmangur radarët dhe për të mbrojtur pilotin nga forcat që e ndjekin në terren.
Ndërkohë, situata është përkeqësuar nga mobilizimi i Gardës Revolucionare dhe milicive Basij, si dhe nga banorë lokalë që shpresojnë të përfitojnë nga shpërblimi për kapjen e pilotit amerikan. Sipas burimeve ushtarake, disa helikopterë amerikanë janë goditur nga zjarri në tokë dhe janë detyruar të bëjnë ulje emergjente në Irak.
Pentagoni synon që piloti të mbijetojë deri në agim, kur operacioni i shpëtimit mund të kryhet me më shumë shanse suksesi. Nëse ai arrin të shmangë kapjen gjatë natës, forcat speciale amerikane do të përpiqen ta nxjerrin nga territori iranian në një operacion që konsiderohet ndër më të rrezikshmit në doktrinën ushtarake amerikane.
